पुणे : शहरातील अनेक रक्तपेढ्या व रुग्णालयांमध्ये सध्या रक्ताचा तुटवडा अधिक प्रमाणात जाणवत चालला आहे. या पार्श्वभूमीवर ’रक्ताचे नाते’ चॅरिटेबल ट्रस्टने पुढाकार घेतला असून संचालक राम बांगड यांनी हा तुटवडा भरून काढण्यासाठी पुणेकरांना रक्तदान करण्याचे आवाहन केले आहे. 

 

सद्य:स्थितीत पुण्यात दररोज सुमारे १ हजार ५०० रक्तपिशव्यांची गरज आहे. परंतु, उपलब्धता फक्त ३०० ते ४०० पिशव्यांपर्यंत मर्यादित आहे. महाविद्यालयांना सुट्ट्या लागल्या आहेत. तसेच, उष्णतेमुळे अनेक रोगांची साथ असल्याने रक्तदान शिबिरांची मोठी संख्याही घटली आहे. परिणामी, रुग्णालयांमध्ये रुग्णांना वेळेवर रक्त मिळण्यात अडचणी निर्माण होत आहेत. राम बांगड म्हणाले, रोज रक्तासाठी ४० ते ५० संपर्क होतात. त्यातून कसेबसे १० ते १५ रक्तदाते व बॅग उपलब्ध होत आहेत. त्यामुळे नियमित रक्तदान करणे अत्यंत आवश्यक झाले आहे. त्यांनी पुणेकरांना पुढाकार घेऊन स्वतः रक्तदान करण्यास आणि आपल्या परिसरात शिबिरे आयोजित करण्याचे आवाहन केले आहे. ज्यांना शक्य आहे, त्यांनी नजिकच्या हॉस्पिटलमध्ये रक्तदान करावे. सरकारी हॉस्पिटलसची रक्ताची उपलब्धता खूप कमी आहे.   विशेषतः ॒ए पॉझिटिव्ह आणि बी पॉझिटिव्ह रक्तगटाच्या पिशव्यांचा तुटवडा जास्त जाणवत आहे.रक्तदान केवळ काही मिनिटांचे काम आहे. त्यामुळे तीन रुग्णांचे जीव वाचू शकतात. हे लक्षात घेऊन तरुणांनी या सामाजिक जबाबदारीत सहभागी व्हायला हवे. रक्तदानासाठी इच्छूकांनी राम बांगड यांच्या ९४२२०८५९२४ या दूरध्वनी क्रमांकावर संपर्क साधण्याचे आवाहन देखील करण्यात आले आहे.